काठमाडौंका मिठाइ पसलहरु हाकाहाकी उपभोक्ता ठग्दै

दशैंमा पनि उपभोक्ताहरु ठगिएको गुनासो चर्को बनेपछि सरकारले दशैं लगत्तै अनुगमनतलाई तीब्रता दिएको छ । दशैं अघि मासु र अन्य खाद्य वस्तुमा केन्द्रित अनुसन्धान तिहार नजिकिदै गर्दा मिठाइमा केन्द्रित हुँदा बुधबार काठमाडौं स्थित एक मिठाइ पसलमा सिलबन्दी समेत गरिएको छ भने अर्को एकको कारोबारमा रोक लगाइएको छ ।

खाद्य प्रविधि तथा गुण नियन्त्रण विभागको अनुगमन टोलीले बुधबार काठमाडौंको नक्साल स्थित अनोमल स्वीट्समा सिलवन्दी गरेको हो । अनुगमनको क्रममा अनमोल स्वीट्सले मिठाईमा अखाद्य वस्तुको प्रयोग गरी उपभोक्ताको स्वास्थ्यमाथि गम्भीर खेलवाड गरेको अनुगमन टोलीको आरोप छ । अनमोल स्वीट्स हाउसमा मिठाई उत्पादन गर्ने स्थानमा रहेको खाद्यवस्तुमा झिँगा, साङ्ला र भुसुनासमेत घुमिरहेको फेला पारेपछि शीलबन्दी गरेको टोलीले जनाएको छ ।
यता आपुर्ति व्यवस्थापन तथा उपभोक्ता हिंत संरक्षण विभागले अनुगमनको क्रममा लाजिम्पाट स्थित पशुपति स्वीट एण्ड चाट हाउस भोजनालयलाई कारोवार गर्न रोक लागाएको छ । पशुपति स्वीट एण्ड चाट हाउस भोजनालयमा भन्साकोठा निकै फोहोर रहेको , वासी मिठाई विक्री वितरण गरेको पाईएकोले कारोवारमा रोक लगाएको टोलीले जनाएको छ ।
यसरी उपभोक्ताको स्वास्थ माथि गरेको खेलवाड गर्ने यस्ता व्यापारीहरुलाई कडाई गनुपर्ने उपभोक्ता अधिकारकर्मीहरुको भनाई रहेको छ ।
मिठाई पसलले तिहारका लागि एक महिना अघिदेखि मिठाई निर्माण गर्ने गरेका छन् । कतिपय पसलले मिठाईको भण्डारणसमेत फोहोर हुने गरेको छ । अनुगमन टोलीले बेच्न ठीक पारिएका कतिपय वासी मिठाईहरु पनि नष्ट गरेको छ ।