मन्त्रिको राजीनामा माग, जिल्ला छिर्न नदिने चेतावनी

पाँच नम्बर प्रदेश टुक्राउन हुँदैन भनेर यस क्षेत्रका सारा जनताले विरोध गरिरहँदा रुपन्देहीबाट निर्वाचित भई हालको मन्त्रिपरिषदमा रहेका रक्षामन्त्री बालकृष्ण खाँड र आपूर्तिमन्त्री दिपक बोहरा कता हराए भनेर जनताले खोजी गर्न थालेका छन् ।

आज शुक्रबार बुटवलमा हजारौँ जनसहभागितालाई एमाले नेताहरु वामदेव गौतम, विष्णु पौडेल, घनश्याम भुषाल, प्रदीप ज्ञवाली र सरकार सम्बद्ध माओवादी केन्द्रका नेता टोप बहादुर रायमाझी र कांग्रेसका नेता चन्द्र भण्डारीले सम्बोधन गरिरहँदा रुपन्देहीबाट निर्वाचित बालकृष्ण खाँड र दिपक बोहरा जनताको पक्षमा एक शब्द पनि उच्चारण नगरी काठमाडौमै हराउँदा जनता आक्रोशित बनेका छन् ।

खाँड र बोहराको निर्वाचन क्षेत्र रुपन्देही २ (भैरहवा), ३ (मणिग्राम)मा ३ दिनदेखि आन्दोेलन चर्किएको छ । आन्दोलनकारीहरुले मन्त्री खाँड र बोहराले जनभावनाको कदर गर्न नसकेको भन्दै राजिनामा समेत माग गरेका छन् । र, जिल्ला छिर्न नदिने चेतावनी दिएका छन् ।