भारतले चीनलाई टक्कर दिन ५० अर्ब खर्चेर अत्याधुनिक तोप किन्ने, उक्त तोप भारत र चीनको सीमानामा तैनाथ भारतीय सेनालाई दिइने भारतीय सञ्चार माध्यमको खुलासा

काठमाडौं,२ मंसिर –भारतीय सैनिकले अमेरिकासँग ५० अर्ब भारुमा अत्याधुनिक हावित्जर तोप किन्ने तयारी गरेको छ । यसबाट छिमेकी मुलुक चीनलाई चुनौति थपिने भारतीय सञ्चार माध्यमहरुले व्याख्या गरेका छन् । भारतीय टेलिभिजन च्यानल आजतक लेख्छ –भारतीय सेनासँग अब हावित्जर तोप हुनेछन् । करिब ५ हजार करोड रुपैयाँमा एम–७७७ हावित्जर तोप खरिद गरिने छ । यी तोप चीनसँग सीमा जोडिएका अरुणाञ्चल प्रदेश र लद्दाखमा तैनाथ भारतीय सेनालाई दिइने छ । समाचारअनुसार सुरक्षा समितिको बैठकमा प्रधानमन्त्री नरेन्द्र मोदीले ति तोप खरिद गर्नका लागि ग्रिन सिग्नल दिइसकेका छन् । भारत र अमेरिकाबीच भएको सम्झौताअनुसार २५ वटा हावित्जर तोप आयात गरिने छ । त्यसबाहेक १२० वटा हावित्जर तोपका पाटपुर्जा किनेर भारतमा जडान गरिने छ । आगामी ६ महिनाभित्रै भारतमा अमेरिकाबाट तोप आउन सुरु हुनेछ । त्यसको १० महिनापछि हरेक महिना दुईवटा तोप मगाइने छ । हावित्जर तोपको पहिलो खेप भारतीय सेनाको १७ औं माउन्टेन स्ट्राइक कोरलाई दिइने छ । सेनाको यो टुकडीले अरुणाञ्चल प्रदेश र लद्दाखको भारत –चीन सीमा क्षेत्रमा निगरानी गर्दछ ।