कुटपिट गरी दम्पतीको हत्या गरेको अभियोगमा पक्राउ

नुवाकोट, २५ कार्तिक, जिल्लाको लिखु–२ मझुवा माथिल्लो टोल बस्ने ७० वर्षीय धनबहादुर तामाङ र उनकी ६५ वर्षीया श्रीमती कान्छी तामाङलाई कुटपिट गरी हत्या गरेको अभियोगमा सोही ठाउँ बस्ने २४ वर्षीय रबि तामाङलाई बुधबार प्रहरीले पक्राउ गरेको छ । जग्गा सम्बन्धी पुरानो विवादलाई लिएर रबिले कुटपिट गर्दा दुवै जनाको घटनास्थलमै मृत्यु भएको थियो । कुटपिटबाट धनबहादुरकी ३७ वर्षीया छोरी दिलमाया तामाङ समेत घाइते भएकी छिन् । यस सम्बन्धमा प्रहरीले थप अनुसन्धान गरिरहेको जनाएको छ ।