बिडिसिए कप क्रिकेट प्रतियोगिताको उपाधि योङ स्टार लार्इ

बैतडीमा जारी बिडिसिए कप क्रिकेट प्रतियोगिताको १६ आैँ संस्करणको उपाधि योङ स्टार क्रिकेट क्लब मेलौलीले जितेको छ । आज सम्पन्न अन्तिम खेलमा एनआरवाइसी बठ्ठालाई १९ रनले पराजित गर्दै मेलौलीले सो उपाधी जितेका हुन् ।

स्थानीय निङ्लाशैनी खेल मैदानमा टस हारेर ब्याटिङ गरेका मेलौलीले सुनिल क्षेत्रीको उत्कृष्ठ प्रदर्शनले निर्धारित २० ओभरमा ७ विकेटको क्षतिमा दुई सय रन बनाएको थियो । सुनिलले छ छक्का र पाँच चौकाको मद्दतले ३६ बलमा ७१ रन बनाएका थिए । यस्तै महेश विष्टले नटआउट २८ तथा मुकुन्द क्षेत्रीले १२ रन जोडेका थिए । एनआरवाइसिका राम चन्द र मदन चन्दले तीन÷तीन विकेट हात पारेका थिए ।

दुईसय एक रनको विजयी लक्ष्यका साथ मैदान उत्रेका एनआरवाइसीले सुरज बोहराको सर्वाधिक ३३ तथा नरेस चन्दको ३० रनको मद्दतले २० ओभर पुरै खेलेर ७ विकेट गुमाउँदै १८१ रन मात्र जोड्न सकेको थियो । मेलौलीका सञ्जय विष्टले दुई तथा मङ्गेस दयाल र वीरेन्द्र नेगीले एक÷एक विकेट हात पारेका थिए ।

मेलौलीले उपाधिसँगै रु २५ हजार, ट्रफी र प्रमाणपत्र तथा द्वितीय भएको एनआरवाइसीले रु १५ हजार नगद, ट्रफी र प्रमाणपत्र प्राप्त गरेका छन् । प्रतियोगितामा उत्कृष्ट प्रदर्शन गरेका मेलौलीका मुकुन्द क्षेत्री म्यान अफ द सिरिजका उपाधि पाए । मुकुन्दले प्रतियोगितामा भएका पाँच खेलमा ५७ दशमलव ६१ को औषतमा सर्वधिक दुई सय ८८ रन बनाएका थिए । म्यान अफ द सिरिज भएका मुकुन्दले एउटा क्रिकेट ब्याट र बल प्राप्त गरेका छन् ।

बैतडी जिल्ला क्रिकेट सङ्घको आयोजनामा कात्तिक २ गतेदेखि सुरु भएको बिडिसिए क्रिकेट कप प्रतियोगितामा १६ टिमको सहभागिता रहेको थियो । प्रतियोगिताको उत्कृष्ठ खेलाडीबाट राष्ट्रिय प्रतियोगिताका लागि क्षेत्र नम्बर ६ बैतडीको टिम बनाइने बैतडी जिल्ला क्रिकेट सङ्घका अध्यक्ष रमेश बोहराले बताउनुभयो ।

विजेता तथा उपविजेतालाई नेपाल क्रिकेट सङ्घ (क्यान)का निलम्बित अध्यक्ष चतुरबहादुर चन्द, प्रमुख जिल्ला अधिकारी किशोरकुमार चौधरीलगायतले पुरस्कार प्रदान गर्नुभयो ।