दलित समितिद्वारा एम्बुलेन्स सञ्चालन

स्याङ्जाको जगत्रदेवी–८ गल्याङमा रहेको नेपाल उत्पीडित दलित समाज विकास समितिले एम्बुलेन्स सेवा सञ्चालन गरेको छ ।
एम्बुलेन्स खरिदका लागि समितिमा आबद्ध २६ आजीवन सदस्यबाट जनही ३३ हजार पाँच सयका दरले झन्डै आठ लाख ७१ हजार रकम सङ्कलन गरिएको समितिका अध्यक्ष कुलबहादुर बिकले बताउनुभयो ।

“हाम्रो गाउँ ठाउँमा कोही बिरामी परेमा यातायात तत्कालै नपाइने र पाइहाले पनि निक्कै महँगो भाडा तिनुपर्ने समस्या थियो,” समितिका अध्यक्ष विकले भन्नुभयो – “अब भने हामीले एम्बुलेन्स सेवा सुरु गरेका छौँ । आशा छ, यस क्षेत्रका बिरामीले केही हदसम्म भए पनि राहतको महसुस गर्नेछन् ।”
सुविधासम्पन्न उक्त एम्बुलेन्स नेपाल सरकारबाट भन्सार छुटमा करिब दश लाखको लागतमा ल्याएको समितिले जनाएको छ । एम्बुलेन्सलाई अझै प्रभावकारी रुपमा सञ्चालन गर्न एउटा छुट्टै समिति बनाएर अगाडि बढ्ने सोचमा समिति रहेको अध्यक्ष बिकले बताउनुभयो ।