ग्रिल उद्योगमा आगलागी हुँदा लाखौँकोे क्षति

दाङ, २८ असोज । ग्रिल उद्योगमा आगलागी हुँदा लाखौँकोे क्षति भएको छ ।

दाङ तुलसीपुर–९ दोघरेस्थित चौधरी ग्रिल उद्योगमा आज दिउँसो भएको आगलागीमा रु तीन लाख २५ हजार बराबरको क्षति भएको सशस्त्र प्रहरी बेस क्याम्प तुलसीपुरका प्रहरी निरीक्षक धनञ्जय केसीले बताउनुभयो ।

मोटसाइकल स्टेन वेल्डिङ गर्नेक्रममा पल्टिएर पेट्रोल पोखिएपछि सो उद्योगमा आगलागी हुन गएको प्रहरीले जनाएको छ ।

प्रहरीका अनुसार, आगलागीबाट तुलसीपुर–९ नयाँ बस्तीका शिव वलीको भे२प ३८१२ नम्बरको स्प्लेन्डर मोटरसाइकल पूर्णरुपमा जलेको छ भने ग्रिल उद्योग र सो उद्योग सञ्चालनमा रहेका दोघरेका गोकर्ण डाँगीको घरमा पनि क्षति पुगेको छ ।

उद्योग सञ्चालक लक्ष्मी चौधरीका अनुसार आगलागीवाट उद्योगका विभिन्न मेसिनहरु जलेका छन् ।

तुलसीपुर नगरपालिकाको वारुणयन्त्र, प्रहरी र स्थानीयवासीको सक्रियतामा आगो नियन्त्रमा लिएको थियो ।