रक पप शैलीको आध्यात्मिक भजनमा पोखरा मन्त्रमुग्ध

नौलो प्रस्तुतिका साथ देशभर सांगीतिक कार्यक्रम गर्दै अघि बढेको सत्यकृत फाउण्डेशनले पोखराको लेकसाइडमा शनिवार दर्शकहरुलाई छुटै सांगीतिक प्रस्तुति दिएको छ । उनीहरुले परम्परागत शैलीलाई परिवर्तन गर्दै युवाहरुलाई लक्षित गरी आधुनिक रक र पप शैलीमा प्रस्तुत गर्दा दर्शकहरु नौलो मानेर मनोरञ्जन बटुलेका थिए ।
सदगुरु श्री हजुरको प्रेरणाले सत्यकृत फाउण्डेशन अन्तर्गतको फुयजन रक भजन व्याण्डका सदस्यद्धारा परम्पारगत भजनहरुलाई नयाँ शैलीमा प्रस्तुत गरेका थिए । साँझ ५ बजे देखि करिव ३ घण्टा पोखराको हल्लनचोकको खुला सडकमा फाउण्डेशनले रक , लोक रक , स्लो रक ,फुयजन तथा टिपिकल भजनहरु प्रस्तुत गरिएको थियो ।
भजन प्रति युवा पुस्ताको आकर्षण बढाउन तथा भजन मार्फत मानिसलाई शान्तिको मार्गमा हिडन प्रेरित गर्न रक भजन कन्सर्टको आयोजना गरिएको आयोजकहरुले बताएका थिए । निशुल्क प्रवेशको व्यवस्था गरिएकाले स्वदेशी तथा विदेशी दर्शकहरु खुलेर भजनमा झुमेको हेर्न र देख्न पाइन्थ्यो । सधै भजन भने पछि उमेर नाघेका र बुढा मानिसहरुको मात्र उपस्थिति पाइने परम्परालाई तोडदै कन्सर्टमा युवाहरुको बाक्लो उपस्थिति पाउँदा मानिसहरु नौलो मान्दै प्रस्तुति हेरेका थिए । पोखरामा सधै जसो सांगीतिक कार्यक्रम हुने गरेपनि फरक प्रस्तुति भएकाले पनि दर्शकहरु सुरुदेखि अन्त्य सम्मनै रमाइलो मानेर झुमेका थिए ।
कार्यक्रम अवधि भर व्याण्डले लोक , रक , पप शैलीका गीत परम्परागत र आधुनिक दुवै बाद्यवादन मार्फत प्रस्तुत गरेका थिए । कार्यक्रमलाई भव्य र आकर्षक बनाउन स्थानीय आयोजकका रुपमा पोखरा पिज्जा हाउस, टि टाइम रेष्टुरेण्ट र टिम फाइभ प्याराग्लाइडिङ रहेका थिए । व्याण्डले यस अघि धरान ,पाल्पा ,काठमान्डौ लगाएतका ठाउँहरुमा यस्तै कन्सर्टको आयोजना गरिसको छ । कार्यक्रमको प्रत्यक्ष प्रसारण न्यूज २४ टेलिभिजनले गरेको थियो ।