बीरगञ्ज भन्सार कार्यालय लक्ष्य भन्दा बढी असुल गर्दै

मुख्य नाकाको रुपमा रहेको वीरगञ्ज भन्सार कार्यालयले चालू वर्षको पहिलो त्रैमासिकमा २७ अर्ब रुपैयाँ भन्दा बढी राजस्व संकलन गरेको छ । भन्सारको यो सङ्कलन लक्ष्यको तुलनामा ५ प्रतिशत बढी हो ।


वीरगञ्ज भन्सार कार्यालयका अधिकृत मोहनराज भट्टका अनुसार चालू वर्ष २०७३र७४ को साउनदेखि असोजसम्ममा २७ अर्ब १७ करोड ५६ लाख २८ हजार रुपैयाँ राजस्व असुली भएको छ । ३ महिनाका लागि भन्सार कार्यालयलाई २५ अर्ब २९ करोड ९५ लाख ४८ हजार रुपैयाँको लक्ष्य तोकिएको थियो ।
सङ्कलित रकम अघिल्लो वर्षको समीक्षा अवधिको तुलनामा १२ अर्ब ६९ करोड ५८ लाख ८० हजार रुपैयाँले बढी हो । अघिल्लो आर्थिक वर्षमा साउन अन्त्यदेखि शुरू भएको वीरगञ्ज केन्द्रित तराई÷मधेश आन्दोलनका कारण राजस्व सङ्कलन अवरुद्ध भएको थियो । त्यसबेला भन्सारको राजस्व १४ अर्ब ४७ करोड ९७ लाख ४८ हजार रुपैयाँमा सीमित थियो । यो रकम लक्ष्यको करीब ६६ प्रतिशत मात्र हो । चालू आवको पहिलो ३ महिनामा सङ्कलित राजस्व मध्ये भन्सार महशुलतर्फ १० अर्ब ११ करोड ७० लाख ४८ हजार रुपैयाँ, मूल्य अभिवृद्धि कर ९ अर्ब ६५ करोड १० लाख ४१ हजार रुपैयाँ र अन्तःशुल्क शीर्षकमा ५ अर्ब ९४ करोड ९० लाख ८८ हजार रुपैयाँ रहेको भन्सार कार्यालयले जनाएको छ । भन्सारले १ अर्ब १ करोड २६ लाख रुपैयाँ पूर्वाधार कर उठाएको छ । अन्य शीर्षकको राजस्व ४४ करोड रुपैयाँ रहेको छ ।
भन्सार कार्यालयले चालू आवमा अन्तःशुल्कमा उल्लेख्य असुली गरेको छ । तीन महिने अवधिमा लक्ष्यको तुलनामा ६५ प्रतिशत बढी अन्तःशुल्क असुल भएको र गाडीको आयात बढेकाले अन्तःशुल्क पनि बढी असुली भएको भन्सार प्रमुख सेवन्तक पोखरेलले जानकारी दिनुभयो । असोज महिनाको सङ्कलनमा ४० प्रतिशत राजस्व गाडीको आयातबाट मात्रै उठेको छ । असोज महिनामा लक्ष्यको तुलनामा ९० प्रतिशत बढी अन्तःशुल्क असुली भएको छ । १ महिनाका लागि १ अर्ब २४ करोड ७८ लाख रुपैयाँको अन्तःशुल्कको लक्ष्यमा २ अर्ब ३७ करोड ९४ लाख सङ्कलन भएको भन्सारले जानकारी दिएको छ ।