निरु चौहानले ‘निरु घरेलु ढाका उद्योग’ सञ्चालनमा ल्याएपछि थुप्रै उद्यमशील महिलाले काम पाए

पथरी ९मोरङ०, २८ असोज । मोरङको उर्लाबारी–४ की निरु चौहानले ‘निरु घरेलु ढाका उद्योग’ सञ्चालनमा ल्याएपछि थुप्रै उद्यमशील महिलाले काम पाएका छन् ।


गत मङ्सिरमा उद्योग दर्ता गर्नुभएका चौहानले हाल पाँचवटा तानबाट ढाका उत्पादन गरिरहनुभएको छ । पाँचवटा तानमा दैनिक पाँचजना महिलाले काम गर्छन् ।त्यसैगरी, निरुले आफ्नै उत्पादनबाट तयार भएका सिलाइका सामग्रीको बिक्री कक्ष पनि सञ्चालनमा ल्याउनुभएको छ । बिक्री कक्षमा साडी, चौबन्दी चोलो, रुमाल, कुर्ता सलबार, झोला र थैली राखिएका छन् ।

धनकुटा बुधबारेका २४ वर्षीया रेखा लिम्बू स्नातक तेस्रो वर्षको परीक्षा दिएपछि अहिले ढाकाको तानमा आफ्नो भविष्य खोज्दै हुनुहुन्छ । उहाँ भन्नुहुन्छ – “पढ्ने सबैले जागिर पाउँदैनन् । सर्टिफिकेट सिरानीमुनि थन्किएको छ । पाएको जागिरबाट सबैलाई सन्तुष्टि कहाँ मिल्छ र रु”

हुन त नेपाली बजारमा तेह्रथुमे ढाका कपडाको एकछत्र राज छ । जहाँ जुन भूगोलमा बुने पनि त्यस उत्पादनको नाम तेह्रथुमे ढाका नभने बिक्री नहुने समस्या अझै पनि छ ।

रु चार लाख लगानीबाट सुरु भएको यो उद्योगबाट हाल मासिक रु एक लाखको कारोबार भइरहेको सञ्चालिका चौहानले बताउनुभयो । विसं २०५५ मा झापा हस्तकला प्रशिक्षण केन्द्रबाट सीप सिक्नुभएका उहाँ अहिले उत्साहित हुनुहन्छ । उद्योग दर्ता गरेर काम थालेको छ महिनासम्म भने उहाँलाई ठूलै सङ्घर्ष गर्नुपरेको थियो ।

कसै कसैले आधुनिक जमानामा ढाकाका कपडा कसले किन्छ र भनेर पनि खिल्ली उडाए । आफूसँग भएको सीपसँग उहाँ पूरै विश्वस्त हुनुहुन्थ्यो । नेपाली धागो उद्योगले उत्पादन गरेको सूती धागो प्रयोग गरेर ढाकाको तान लगाउने उहाँले जानकारी दिनुभयो । । हाल चौहानले उत्पादन गरेको ढाकाको माग उच्च छ । उहाँ भन्नुहुन्छ – “खासगरी साडी र सर्टका कपडा युरोप र अमेरिकासम्म जान थालेका छन् ।”

विभिन्न गैरसरकारी संस्थाले उर्लाबारी क्षेत्रमा पनि बारम्बार ढाका बुन्ने तालिम सञ्चालन गरे पनि दक्ष जनशक्ति उत्पादन नहुँदा उर्लाबारीकै उद्योग धरासायी बनेका छन् । उहाँ भन्नुहुन्छ – “ढाका कपडा टिकाउ मात्र हैन, बिकाउ पनि हुने गरेकाले देशभरबाट माग आउँछ तर, जनशक्ति छैन ।”

निरुसँगै सीप सिकेर स्वावलम्बी बन्नुभएका देवका बास्कोटा ढाकाको माग उच्च भए पनि स्वदेशी उत्पादन र पहिचानप्रति युवापुस्ताको ध्यान जान सके ढाकाको बजार फस्टाउने बताउनुहुन्छ ।

ढाका कपडा देशको जुनसुकै भूगोलमा बुनिए पनि गुणस्तरीय भए बजारको अभाव चौहानको उद्योग सञ्चालनबाट प्रष्ट भएको छ ।