मृत्यु कुर्दै १४६ वर्षका वृद्ध

एजेन्सी : सामान्य व्यक्तिको आयु कति वर्षको होला ? धेरै भए ९० वा १०० ? तर इन्डोनेसियामा एक जना वृद्धा भेटिएका छन् । जसको उमेर १४६ वर्ष हो । बयोवृद्ध सपरमान सोदीमेजोसँग इन्डोनेसियन परिचयपत्र छ जसमा उनको जन्ममिति उल्लेख गरिएको छ, ३१ डिसेम्बर १८७० । उनको परिचयपत्रलाई आधार मान्ने हो भने विश्वमा अहिलेसम्मकै सबैभन्दा वृद्ध दावी गरिएकी फ्रेन्च महिला जेयन्ने काल्मेन्ट, जसको १२२ वर्षको उमेरमा निधन भएको थियो, भन्दा उनी निकै अगाडि बढिसकेका छन् ।

नाति सुर्यन्तोका अनुसार १२२ वर्षको उमेर पार गरेपछि सोदीमेजो आफ्नो मृत्यूको लागि तयारी गरेर बसेका छन्, तर मृत्यूले उनलाई अहिलेसम्म चियाएको छैन । सुर्यन्तोले भने, ‘उहाँले २४ वर्षअगाडि नै आफ्नो लागि ग्रेभस्टोन (चिहानको स्तम्भ) बनाएर राख्नुभएको छ । हामीले उहाँको लागि चिहानस्थल पनि तयार पारिसकेका छौं जुन उहाँका छोराछोरीको नजिकै हुनेछ ।’



अपत्यारिलो उमेरका बाबजुद यी वृद्ध व्यक्ति अझै पनि आफैं हिँडडुल गर्न सक्छन् । ‘उहाँ जे पनि खानुहुन्छ र अहिलेसम्म बिरामी भएर सुत्नुभएको पनि छैन,’ परिवारका एक सदस्य भन्छन् ।

इन्डोनेसियाली अभिलेख कार्यालयका कर्मचारीले परिचयपत्रका आधारमा उनको उमेर १४६ वर्ष भएको बताएका छन् तर यसको स्वतन्त्र पुष्टी हुन बाँकी छ । उनी इतिहासकै सबैभन्दा वृद्ध मानिस भएको प्रमाणित गर्न उनका कागजातहरुको स्वतन्त्र परिक्षण गर्नुपर्ने हुन्छ ।



उनीभन्दा अगाडि नाइजेरियाका जेम्स ओलोफिन्टुइ १७१ वर्षको र इथियोपियाका धाकाबो एब्बा १६३ वर्षको भएको दावी गरिएको छ । तर उनीहरु दुवैको उमेर प्रमाणित गर्ने कागजात उपलब्ध छैनन् ।