गुच्छी च्याउ प्रति किलो २५ देखि ३० हजार भारुमा बिक्ने

बजारको मामुली तरकारीको भाउले समेत आकास छोइरहेको परिप्रेक्ष्यमा गृहिनीहरुलाई दुनियाकै सबैभन्दा महंगो यस तरकारीको बारेमा सुनाइदिने हो भने साँच्ची आफ्नै कानमाथि विश्वास गर्न सक्दैनन् होला । तरकारी किन्न बजारमा जाने गृहिणीहरुको दैनिकजसो गुनासो हुनेगर्छ की तरकारीको भाउले आकास छोइसक्यो । दुनियाको सबैभन्दा महंगो तरकारीको भाउ सुन्दा जो कोहीलाई पनि अचम्म लाग्न सक्दछ । दुनियाकै सबैभन्दा महंगो तरकारी गुच्छी च्याउ हो । गुच्छी च्याउ प्रति किलो २५ देखि ३० हजार भारुमा बिक्ने गरेको जानकारी गराईएको छ । वैज्ञानिक नाम मार्कुला एस्क्यूपलेटा रहेको गुच्छी च्याउ औषधिय गुणले भरिपुर्ण मानिन्छ ।


भारतमा ठूला ठूला कम्पनी तथा होटेलहरुले यसलाई महंगोमा किन्ने गरेका छन् । त्यसैले भारतमा गुच्छी पाइने क्षेत्रका मानिसहरु फेब्रुअरी देखि अप्रिलसम्म गुच्छी खोज्न पहाडतिर धाउँछन् । यो च्याउको माग भारतसँगै अमेरिका, युरोप, फ्रान्स इटाली तथा स्विजरल्याण्ड सम्मै रहेको छ ।
नेपालमा समेत उच्च पहाडि तथा हिमाली भेगमा पाइने तर खासै महत्व नपाएको गुच्छी च्याउ भारतमा भने सुनको भाउमा बिक्ने गरेको छ । खासगरी हिमाचल, कश्मीर लगायतका क्षेत्रमा पाइने गुच्छी च्याउ प्रति किलो २५ देखि ३० हजार भारुमा बिक्दछ ।
भारतीय सचार माध्यमका अनुसार बिजुली चम्किएको बेला हिउँ पग्लिएपछि हिउँमुनिबाट यो च्याउ बाहिर निस्किन्छ । यसलाई मानिसहरुले टिपेर जम्मा गरेर राख्ने तथा जाडोको मौसममा पकाएर खाने गर्दछन् ।