दुर्घटनामा एकको मृत्यु

भक्तपुर, ९ कात्तिक । नम्बर नखुलेको एक सवारी साधनले ठक्कर दिँदा चाँगुनारायण नगरपालिका– १७ झौखेल घर भई हाल जगाते बस्ने वर्ष ५४ का हरि माकजूको मृत्यु भएको छ ।मध्यपुर थिमि चोक नजिकै आकासे पुलमुनि ठक्कर दिएर सवारी साधन बेपत्ता भएलगत्तै घाइते माकजूलाई उपचारका लागि मध्यपुर अस्पताल लगिएको तर उनको बाटैमा मृत्यु भएको प्रहरीले जानकारी दिएको छ ।

महानगरीय प्रहरी परिसर भक्तपुरका प्रहरी निरीक्षक प्रकाश विष्टका अनुसार ठक्कर दिएर भागेका सवारी र सवारी चालकको खोजी भइरहेको छ ।मृतकको शव परीक्षणका लागि शिक्षण अस्पताल महाराजगञ्ज पठाइएको छ ।