नवलपरासीमा यस बर्ष धान उत्पादनमा वृद्धि हुने अनुमान

दशैँ पर्व सकिए लगतै नवलपरासीका किसानहरु यतिबेला धान काट्न कम्मर कसेर लागिपरेका छन् । धान तयार भएपछि तयार भएका धान बाली भित्राउन किसानहरु लागि परेका हुन् । यस पटक पहाडी क्षेत्र बाहेकका धैरे किसानहरुले धान भित्रयाउने आधुनिक मेसीन प्रयोगमा ल्याउन थालेका छन् । भने धान उत्पादनमा पनि बृद्धि हुने अनुमान गरिएको छ ।


यस बर्ष उपयुक्त बर्षा र प्राप्त मल किसानहरुले सहज रुपमा प्राप्त गरेपछि अघिल्ला बर्षको तुलनामा करिब १५ देखि २० प्रतिशतले धान उत्पादनमा बृद्धि हुने आकलन गरिएको जिल्ला कृषि विकास कार्यालयले जनाएको छ । यस बर्ष कुल खेती योग्य जमिन मध्ये ४४ हजार ७ सय ५० हेक्टर क्षेत्रफलमा धान खेती गरिएको कार्यालयका योजना अधिकृत श्रीकान्त घिमिरले बताउनुभयो ।
अघिल्लो आर्थिक बर्षमा १ लाख ६७ हजार १ सय ५९ मेट्रिक टन धान उत्पादन भएकोमा सोको तुलनामा १५ देखि २० प्रतिशतले धान उत्पादनमा बृद्धि हुने पक्का छ । अघिल्लो बर्षको तुलनामा धान खेती गर्ने जग्गा मध्ये आवासीय क्षेत्र भएका कारण तुलनात्मक रुपमा धान खेती गर्ने क्षेत्रफलमा सामान्य कमी आएको कार्यालयका बाली संरक्षण अधिकृत श्रीधर पौडेलले बताउनुभयो ।
नवलपरासीमा उत्पादन भएका धान किसानहरुले स्थानीय चामल र चिउरा मिलहरुमा बिक्री गर्दै आएका छन् । धान बाट उत्पादित चिउरा र चामल यस जिल्लाबाहेक काठमाडौ , चितवन , पोखरा , बीरगन्ज लगायतका अन्य बजारहरुमा बिक्री बितरण हुने गर्दछ । कृषिलाई आधुनिकीकरण गर्न राज्यले ध्यान दिनुपर्ने किसानहरुको भनाई छ ।
यस पटक नवलपरासीमा मोटा , चैते दुई , चैते चार , चैते छ , ध्युपुरी र हर्दिनाथ लगायतका अन्यप्रजातीका धान रोपीएको छ । चैते धान जिल्लाको नवलपुर क्षेत्रका बिभिन्न गाविसमा लगाईने गरिन्छ । नवलपरासी जिल्लाका दक्षिणी भाग र भित्रि मधेशको नवलपुर क्षेत्रमा बढि मात्रामा धान खेति गरीदै आएको जिल्ला कृषि बिकास कार्यालयले जनाएको छ । नवलपरासी जिल्ला धान खेतिमा अब्बल दर्जामा पर्दछ ।