साउदी नेतृत्वको हवाई कारबाहीमा यमनमा २७ को मृत्यु

साना । साउदी अरेबिया नेतृत्वको सेनाले शनिबार यमनको तीनवटा प्रान्तमा गरेको हवाई कारबाहीमा परी २७ जनाको ज्यान गएको छ ।
उक्त हवाई हमलामा परी कम्तीमा पनि २७ जनाले ज्यान गुमाएका सरकारी र स्थानीयवासीहरुले जानकारी दिएका छन् । विद्रोही लक्षित सो सैनिक कारबाही यमनी बस्तीहरुमा परेको जनाइएको छ । उक्त हमलामा परी सर्वसाधारण मारिएका छन् ।  सो हमलामा मारिएका सर्वसाधारणमा महिला, बालबालिका नै बढी परेका अधिकारवादीहरुले जानकारी दिएका छन् ।
यमनको दक्षिणपश्चिममा पर्ने ताइज प्रान्तको सलो जिल्लामा अवस्थित अल सराफ र मबरान गाउँमा शनिबार विहान सबेरै सो हमला भएको थियो ।  ती गाउँहरुमा विद्रोही रहेको सूचनाको आधारमा सो कारबाही गरेको जनाएको छ । साउदी अरेबियाको नेतृत्वको सेनाले यमनमा विगतदेखि नै यस्तो हमला गर्दै आएको छ ।  सो हमलामा परी यहाँका विद्रोही भन्दा पनि बढी सर्वसाधारण मारिने गरेको बताउँदै आएको छ ।