करेन्ट लागेर एकको मृत्यु

भक्तपुर, ११ कात्तिक । मध्यपुरथिमि नगरपालिका–१७ मनोहरा सागबारीमा करेन्ट लागेर आज दिलकृष्ण तकोको मृत्यु भएको छ । अपराह्न सागबारीमा पानी हाल्नका लागि पानी तान्ने पम्पमा विद्युत जोड्दा करेन्ट लाग्दा दिलकृष्णलाई बचाउन जाने दुईजनासमेत घाइते भएको महानगरीय प्रहरी वृत्त थिमिका प्रहरी नायब उपरीक्षक श्यामबाबु ओलीयाले जानकारी दिनुभयो ।


घाइते हुनेमा दिलकृष्णका श्रीमती ज्ञानमाया र छोरा चन्द्रकृष्ण छन् । त्यसैगरी यही कात्तिक ६ गते मध्यपुरथिमि–१२ का लीना श्रेष्ठको बा. ४६ प. ८०२३ नम्बरको स्कुटर चोरी गर्ने दुई जनालाई प्रहरी वृत्त थिमिले गौशाला प्रहरीको सहयोगमा पक्राउ गरेको छ ।

पक्राउ पर्नेमा दोलखा ठाडो–५ का सुरेश खड्का र मध्यपुरथिमि–२ का निरज बज्राचार्य रहेको प्रहरीले जनाएको छ ।