स्वयम्भू घुम्न गएका युवतीको गहना र युवकको मोवाईल दिउसै यसरी लुटियो

काठमाडौं, ९ कात्तिक । स्वयम्भू घुम्न निस्किएका दुई युवा–युवती लुटिएका छन् । काठमाडौंको स्वयम्भुस्थित आनन्दकुटी भन्ने स्थानमा वैतडी सितड–७ स्थायी घर भएका २३ वर्षीय दिनेश प्रसाद जोशी र ओखलढुङ्गा फुलवारी– ५ स्थायी घर भएकी १९ बर्षिया मिना लुइटेल लुटिएका हुन् ।

पाँच जनाको समुहमा आएका लुटेराहरुले डल्लुमा डेरा गरेर बस्दै आएकी मिनाको १ तोलाको सुन सिक्री र दिनेको साथमा रहेको दुई थान मोवाइल लुटपाट गरेको महानगरीय प्रहरी वृत स्वयम्भुले जनाएको छ । लुटपाट कार्यमा संलग्न दोलखाका ३२ वर्षीय किरण नेपालीलाई पक्राउ गरिएको महानगरीय प्रहरी वृत स्वयंभुका डिएसपी कोमल शाहले जानकारी दिए ।

नेपाली डल्लुमा डेरा गरी बस्दै आएका थिए । ‘उक्त घटनाको खबर प्राप्त हुनासाथ हाम्रो प्रहरी टोलीले लुटपाटमा संलग्न नेपालीलाई पक्राउ गरेको हो’ डिएसपी शाहले भने, ‘अन्य लुटेराहरुको खोजतलास भइरहेको छ ।’