राष्ट्रिय आविष्कार केन्द्र स्थापनार्थ अभियानमा २ लाख ६६ हजार ५ सय हङकङ डलर संकलन

म्याग्दी प्रवासी नेपाली संघ (मोना) हङकङले महावीर पुनले सुरू गरेको राष्ट्रिय आविष्कार केन्द्र स्थापनार्थ अभियानमा २ लाख ६६ हजार ५ सय हङकङ डलर अथात् करिव ४० लाख नेपाली संकलन गरेको छ ।


दशैंतिहारको अवसरमा हालै शुभकामना आदानप्रदान सहित हङकङ मंकिहिलमा भएको कार्यक्रममा उक्त रकम संकलन गर्न सफल भएको मोना हङकङका अध्यक्ष इन्द्र एलजी थापा मगरले बताउनुभयो । हङकङमा रहेका म्याग्देलीहरुको साझा संस्था मोना हङकङको आयोजनमा भएको कार्यक्रममा हङकङमा रहेका नेपालीहरूको उत्साहजनक सहभागिता रहेको थियो । हरेकबर्ष देउसीभैलो मार्फत राष्ट्रिय तथा म्याग्दी जिल्लामा आवश्यक पर्ने सहयोगहरु जुटाइरहेको मोना हङकङले यसपटक नेपालीहरुको सहयोगमा केहीदिनमै ४० लाख संकलन गर्न सफल भएको मोना हङकङका निर्वतमान अध्यक्ष एवम् कार्यक्रम संयोजक दल सेर्बुजाले बताउनुभयो । उठेको सबै रकम नेपालमा रहेको आविष्कार केन्द्रको खातामा जम्मा गरिने छ ।